Ég fór til Jakobs sjúkraþjálfara í dag, í fyrsta sinn í meira en ár. Mjóbakið oft að bögga mig á kvöldin eftir því sem vömbin stækkar og þá er um að gera að fara til Jakobs töframanns. Það var yndislega ljúft að liggja fyrst í hálftíma á undan nuddinu með heita bakstra á bakinu og hálsinum og undirrituð sofnaði að sjálfsögðu eins og vanalega :) Rétt eins og ég sofna á þessum 15 mínútum þegar við slökum á í meðgöngujóganu...

Það þarf greinilega ekki svo mikið til að svæfa mig - ég fyllist meira að segja af einstakri værð og þarf að berjast við að halda augunum opnum ef ég þarf að bíða eftir tannlækninum mínum eftir að ég sest í tannlæknastólinn. Og tannlæknaheimsóknir eru þó ekki með því skemmtilegasta sem ég geri...