Við Ragna Björk skruppum í bíltúr á Selfoss í dag. Vörðum deginum hjá Sóltúnsömmunni og hittum líka afann, Guðbjörgu og krakkana. Yndislegur dagur og ég er staðráðin í því að vera duglegri að fara í svona skreppitúra í sumar! :)

Mamma hefur oft minnst á það þegar hún er að keyra á milli Reykjavíkur og Selfoss, hvað það eru margir þungaflutningabílar á þjóðveginum. Þar sem ég var nú á ferðinni í kringum hádegi á virkum degi, tók ég sérlega vel eftir þessu. Það er allt morandi í risatrukkum! :( Á leiðinni heim ákvað ég að telja alla trukkana og þá er ég ekki að meina svona venjulega stóra flutningabíla heldur þessa risastóru tröllatrukka eins og maður sér í bandarískum vegakvikmyndum. Þá voru þeir auðvitað ekki eins margir, enda klukkan orðin sex á föstudagskvöldi - en ég taldi samt 11 svona tröllatrukka sem mér finnst nú heldur meira en var hérna í den! Sá reyndar eftir því að hafa ekki dundað mér við að telja hjólhýsi og húsvagna því þeir skiptu tugum! Allir á leiðinni upp í sveit í helgar- eða sumarfrí.

Fyrst ég er komin í umferðarpælingarnar, þá verð ég líka að minnast aðeins á bílinn sem ég keyrði fyrir aftan á leiðinni austur. Lenti fyrst fyrir aftan hann við Rauðavatnið og horfði þá á bílstjórann henda sígarettu út um gluggann. Leiðir okkar skildu þegar hann fór fram úr mér nokkru síðar en svo lenti ég aftur fyrir aftan sama bíl við Hveragerði og viti menn, subban var þá búin að reykja aðra sígarettu sem einnig kom fljúgandi út um gluggann. Og til að kóróna herlegheitin var sóðinn með límmiða frá tryggingafélaginu sínu í afturglugganum þar sem stóð að hann væri fyrirmyndarökumaður. Get ekki að því gert, þeir sem henda rusli (og hvað þá logandi rusli!) út um bílglugga eru ekki fyrirmyndarökumenn í mínum huga...