Litla daman fór í fyrsta baðið á föstudaginn. Amma Ragna var viðstödd og tók myndir af viðburðinum. Líkt og hún greinir frá í bloggfærslu hjá sér þá var heilmikið fjör hjá litlu skvísunni sem kunni greinilega vel að meta baðferðina.

Annars héldum við nú í gær að amman hefði verið aðeins of bráð á sér að hæla því hvað ömmubarnið væri rólegt... Aðfararnótt laugardagsins og allan laugardaginn fram til tvö að nóttu var nefnilega komið aðeins meira líf í dömuna og hún vildi helst fá kokteilinn úr mjólkurbúi móðurinnar öllum stundum og kvartaði þegar hún átti að liggja ein í rúminu sínu og hvíla sig.

Við vissum svo sem alveg að þetta væri nú of gott til að vera satt og bjuggumst alveg eins við að hún myndi hætta að sofa svona mikið. Og þarna virtist það vera að koma í ljós.

En þetta virðist nú gengið yfir í bili og mín bara sefur vært í dag. Kannski bara vaxtarkippur í gær.

Amma Björk kíkti í heimsókn í dag og svo kom Helga Steinþórs að kíkja á okkur. Þessa fyrstu viku höfum við bara fengið nánustu ættingja í heimsókn en núna þegar við erum nokkurn veginn kominn upp á lagið með nýjar heimilisvenjur þá væri nú gaman að fara að hleypa fleirum að. Áhugasamir eru bara beðnir um að hafa samband :)

Núna seinni partinn fékk daman svo sannkallaða prinsessumeðferð. Eftir bleyjuskiptin um hálffimmleytið fengu litlar hendur og fætur nudd með ólífuolíu til að varna þurrki. Og eftir mjólkurskammtinn kl. hálfsex fékk hún handsnyrtingu og lá makindalega og svaf meðan mamman raspaði hvassar brúnir af nöglunum.

Já, þetta er ljúft líf hjá lítilli stúlku ;)