Veit ekki hvort þetta er eitthvað sem tengist krabbastjörnumerkinu, en við Stefa vinkona erum báðar þannig að okkur finnst svo svakalega gaman að eiga afmæli! :) Ég held t.d. að það sé ástæðan fyrir því að Stefa hefur ekkert bloggað síðan á afmælinu sínu þann 1. júlí, er ekki tilbúin að hætta að eiga afmæli alveg strax ;) hehe og ég skil hana bara alveg!

Við mægðurnar (og í þetta skiptið er ég að tala um mömmu, Guðbjörgu og mig) erum ásamt Björk tengdamömmu búnar að ætla lengi að kíkja saman á Tapasbarinn. Þegar kom að því að velja dag fannst okkur eiginlega tilvalið að tengja það við afmælið mitt og við tókum því smá forskot á sæluna í gær og skelltum okkur út að borða og höfðum sem afmælisdinner, þó dagurinn sjálfur sé ekki fyrr en í dag. 

Við fengum okkur allar óvissuferð í gegnum matseðilinn og maturinn var svo svaaaaakalega góður, eins og hann reyndar alltaf er á Tapasbarnum. Ég var virkilega stolt af sjálfri mér að treysta mér til að panta óvissuferðina, vel vanalega sjálf alla mína rétti sjálf (og eiginlega alltaf sömu réttina sem ég veit að eru góðir...hmmm) en langaði til að vera í óvissufílingnum með þeim hinum. Kannski er ég að fullorðnast eitthvað... vona samt ekki!

Í dag ætla ég svo ekkert að láta rigninguna trufla daginn, afmælisdagur er alveg jafn flottur og fínn þó það sé rigning, og ætla m.a. að kíkja í Hagkaup og kaupa mér nýja diskinn með íslensku 80´s lögunum fyrir hluta af afmælispeningunum. Vona bara að dóttir mín nenni með mér í þessa einu búð í tilefni dagsins ;)