Ég fékk ansi skemmtilegt tilboð í gær. Theó og Elva fengu þá snilldarhugmynd að koma og heimsækja mig þegar ég verð orðin afvelta af óléttu og við gætum horft saman á Pride and Prejudice. Ég er að sjálfsögðu til í tuskið og bíð því í ofvæni eftir að verða afvelta :) Þessir þættir eru ein sú mesta snilld sem ég hef séð og það er að sjálfsögðu toppurinn að horfa á þá með tveimur af aðalaðdáendunum. Og bara til að hafa það á hreinu, þá erum við að sjálfsögðu að tala um rúmlega 5 klukkutíma Colin Firth útgáfuna frá 1995 en ekki myndina sem kom út á síðasta ári!

Svo var ég líka að segja við Jóa í dag að mig langaði til að horfa aftur frá upphafi á Star Trek: Deep Space Nine og Star Trek: Voyager og sé fyrir mér að það væri stórsniðugt að ráðast til atlögu við aðra hvora seríuna í lok mars þegar ég hef störf sem einkamjólkurbú. Nú er bara spurningin hvar ég næ að redda mér þáttunum, nenni eiginlega ekki að fara á videoleiguna á hverjum degi til að ná í nýja þætti og skila. Einhvern veginn finnst mér ólíklegt að meðal þeirra sem lesa bloggið mitt, leynist margir Trekkarar - en ég ætla samt að prófa að varpa hér fram þeirri spurningu hvort einhver ykkar eigi eitthvað af þessum þáttum og sé til í að lána mér.

Live long and prosper!