Mér finnst bókaávísunin, sem Íslendingar virðast nú eiga að fá í þjóðargjöf árlega, alveg frábær hugmynd! :) Sem mikill bókaunnandi finnst mér yndislegt að fá á silfurfati afsökun fyrir því að þjóta út í bókabúð að kaupa bækur.

Ég fór í Eymundsson í dag og ákvað að kaupa mér bókina "Burt með draslið ". Held að hún sé samin sérstaklega fyrir fólk eins og mig, svona öfgafulla draslsafnara ;) Ætla að hafa hana við hendina öllum stundum og þegar heltekur mig samviskubit vegna yfirþyrmandi drasls og óreiðu á heimilinu, þá gríp ég bara bókina, les nokkra kafla og læt mig dreyma um hvernig ég mun loksins ná tökum á draslinu. Á morgun. ;) Nei nei, enga neikvæðni. Ég ætla að vera ofsalega dugleg að læra af bókinni enda sýnist mér strax við fyrstu athugun að þetta sé þrælsniðug bók og geti kennt manni margt.

En bókin kostaði ekki 3000 kr. svo að ég þurfti að finna aðra bók með til að geta nýtt ávísunina. Ákvað að endingu að kaupa aðeins fram í tímann og keypti "Barnabókina ", svaka skemmtilega harðspjaldabók fyrir Rögnu Björk. Veit nú ekki hvort hún hefur áhuga á að skoða bækur strax... en ég verð tilbúin þegar þar að kemur! :)