Þá fer víst að líða að því að við þurfum að skapa smá pláss í aukaherberginu okkar til að koma fyrir skiptiborði og öðrum barntengdum hlutum. Skrifborðið sem ég keypti til að föndra á og setti þangað inn, á nú að leysa af borðið inni í vinnuherbergi (því það er eilítið stærra). Tölvumálin hafa líka verið endurskoðuð og nú verður hægt að föndra og tölvast inni í vinnuherbergi. Gamla borðið mitt sem hefur hingað til borið tölvuna, pappíra og fleira verður því kvatt með virktum og er því þökkuð dygg og góð þjónusta í gegnum tíðina.

Þetta er vandað og sterklegt beykiskrifborð og vel með farið. Málin á því eru 140cm x 64 cm (platan) og 72cm (hæðin). Engar skúffur eru á borðinu, en hægra megin höfum við fest lyklaborðsskúffu sem renna má undir borðið. Hana má þó auðveldlega skrúfa af, ef nærveru hennar er ekki óskað.

Nú er bara spurningin hvort einhver væri spenntur fyrir að eignast borðið góða fyrir 5000 kr. ? :)