Mamma skrifaði í orðabelginn hjá mér í gærkvöld og spurði hvort ég væri alveg hætt að blogga. Mér fannst svolítið fyndið að hún væri einmitt að nefna þetta núna, því að fyrr um kvöld var ég að hugsa að nú þyrfti ég alveg endilega að fara að blogga! ;) Það hafði þó ekkert orðið af því, og kannski ágætt að fá smá áminningu til að það komi nú eitthvað "á blað".

Af mér er helst að frétta að ég byrjaði aftur að vinna á föstudaginn eftir 2 vikna veikindaleyfi en ég dreif mig loks í æðahnútaaðgerð til að losna við stóra skrímslið af hægri kálfanum. Aðgerðin gekk vel og þó fóturinn sé allsvakalega marinn (og verður líklegast í nokkurn tíma) þá hef ég það gott og er varla neitt aum lengur. Ég verð alla vega svaka skvísa í sumar, æðahnútalaus ...og vonandi marblettalaus líka, því satt best að segja þá var sjónlýtið af æðahnútnum næstum ekkert miðað við þessa svaðalegu marbletti. Ég fékk Jóa til að mynda marinn fótlegginn, en ég held ég sé ekkert að gera ykkur það að birta þá mynd hér - þið mynduð bara fá martraðir ;)

Þó ég væri í veikindaleyfi, fékk ég samt að mæta á heklnámskeiðið í Hlíðaskóla en textílkennarinn er með námskeið fyrir kennura og annað starfsfólk skólans í að læra að hekla. Ég lærði í fyrsta tímanum að hekla svokallaðan ömmuferning og sit nú á kvöldin fyrir framan sjónvarpið (eða með hljóðbók í eyra) að hamast við að hekla ömmuferninga. Planið er svo að skella þeim saman í lítið teppi handa Rögnu Björk.

Framundan eru síðan ýmsir hittingar og skemmtilegar samkomur svo að ég ætti nú að hafa frá einhverju að segja. Ef ekkert heyrist frá mér aftur á næstunni, ekki hika við að skrifa í orðabelginn og skamma mig pínu. Það náttúrulega gengur ekki að vera latur við bloggið, þetta aðaláhugamál þjóðarinnar! ;)